Balalar shayırı Saǵıydulla Abbazovtıń 95 jıllıǵına baǵıshlanǵan ádebiy sáwbetlesiw keshesi

XX ásir Qaraqalpaq ádebiyatınıń barlıq janrları boyınsha keń rawajlanǵan dáwiri boldı. Usı bay ádebiyatımızdıń bir tarawı- balalar ádebiyatınıń ósiwinde, mazmunlıq jaǵınan jetilisiwinde karaqalpaq balalar ádebiyatınıń iri tulǵalarınıń biri S. Abbazovtıń ózine ılayıq úlesi boldı.

«1-iyun Xalıqaralıq balalar kúni» aldınan 27-may kúni Berdaq atındaǵı Qaraqalpaq ádebiyatı tariyxı mámleketlik muzeyinde belgili balalar shayırı Saǵıydulla Abbazovtıń 95 jıllıǵına baǵıshlanǵan ádebiy sáwbetlesiw keshesi bolıp ótti. Kesheni muzey direktorı Sh.Payzullaeva kiris sóz benen ashıp berdi. Balalar jazıwshısı-Kóbeysin Ernazarov, «Ámiwdárya» jurnalınıń bas redaktorı-Xalila Dáwletnazarov, shayır Jumaniyaz Óteniyazov, Qaraqalpaqstan Radiokanalı saz-sáwbet esittiriwiniń bas redaktorı-Gúlnaz Nurbekova, shayırdıń áwladları, student jaslar hám keń jámietshilik wákilleri qatnastı. Ádebiy keshe dawamında birge islesken kásiplesleri shayırdı peyli keń, bárqulla adamlarǵa tek jaqsılıqtı ǵana oylaytuǵın, kásipleslerine óz másláhátin berip qollap otıratuǵın pidayı insan sıpatında eske túsirdi. Saǵıydulla Abbazovtıń ómir jolı, dóretiwshiligi, hár bir shıǵarmasınıń balalar ómirindegi áhmieti tuwralı sáwbetlesti.