«Zamanamız qaharmanları» — jaslardı watansúyiwshilikke shaqıratuǵın ilaj

Ózbekstan - kóp milletli mámleket. Bul jerde júzden artıq millet wákilleri tatıw hám doslıqta jasap kelmekte. Olardıń úrp-ádetleri, mádeniyatı, tili, dini húrmet etiledi, rawajlandırıladı hám qollap-quwatlanadı. Bunıń ayqın mısalı sıpatında Ózbekstan Respublikası Ministrler Kabineti tárepinen usı jıldıń 28-yanvar kúni tastıyıqlanǵan «2025-jılda respublikada diniy-aǵartıwshılıq ortalıq turaqlılıǵın támiyinlew boyınsha ámelge asırılatuǵın is-ilajlar baǵdarlaması»na muwapıq Berdaq atındaǵı Qaraqalpaq ádebiyatı tariyxı mámleketlik muzeyinde 2025-jıldıń 5-iyun sánesinde «Zamanımız qaharmanları» atamasında milletleraralıq tatıwlıqtı úgit-násiyatlaw maqsetinde kórgizbeli ilaj ótkerildi.

Ilajda "Máripat" úgit-násiyatshılar toparı aǵzaları Quwanıshbay Yusupov hám Asqar Abatov, Qaraqalpaqstan Respublikası Qazaq milliy-mádeniy orayı baslıǵı Asqar Úmbetaev, Nókis qalası 25-sanlı mekteptiń okıtıwshısı Dilbar Ismaylova, Qaraqalpaq mámleketlik universiteti studenti Aymurzaeva Ulbosın ózleriniń tereń mazmunǵa iye bayanatları menen qatnastı. Ilajdı joqarı dárejede ótkeriwde paytaxtımızda jaylasqan mekteplerde tálim alıp atırǵan qazaq, túrkmen, rus, ukrain, korees hám basqa da millet wákilleriniń oqıtıwshı hám oqıwshı-jaslarınıń óz milletiniń milliyligin sáwlelendiriwshi kórgizbeli shıǵıwları menen belsene qatnastı.