Milliy miyrasqa meniń úlesim

Ózbekstan Respublikasına miyneti sińgen mádeniyat xızmetkeri, Qaraqalpaqstan xalıq shayırı, Berdaq atındaǵı mámleketlik sıylıǵınıń laureatı GÚLISTAN MATYAKUBOVA óz arxivindegi qoljazbaların, shıǵarmalar jıynaǵın hám óziniń uslap tutqan buyımların, portretlerin muzeyimizge sawǵa etti. Bul — tek bir adamnıń ǵana emes, ulıwma milletimizdiń ruwxıy, ádebiy, mádeniy baylıǵı. Shayırdıń sońǵı jılları baspadan shıqqan toplamlarında ana Watanǵa muhabbet, insan tuyǵılarına sadıqlıq, opadarlıq, adamgershilik, pidayılıq sıyaqlı aǵla páziyletler jırlanadı. Shayır qosıqların oqıp otırıp, aq kókirek, márt, miynetkesh xalqımızdıń kelbeti kóz aldımızǵa keledi.